O vindeiro martes 18 de febreiro terá lugar a presentación do poemario Moda galega reloaded (Edicións Positivas) da escritora María Reimóndez. O encontro celebrarase ás 20 horas na Libraría Suevia (r/Vila de Negreira, 32), e contará coa presenza do editor Francisco Macías, a poeta Antía Otero e a autora, María Reimóndez.
María Reimóndez regresa ao universo poético do seu primeiro poemario ‘Moda galega’ (Positivas, 2002) máis de dez anos despois. Nesta primeira obra, Reimóndez deitaba unha ollada crítica e mordaz á sociedade consumista e que obxectaliza os corpos das mulleres. O seu novo poemario ‘Moda galega reloaded’ (Positivas, 2013) revisa e actualiza a obra de 2002. “Fai un cuestionamento palmario tanto das leis económicas que se nos impoñen como dos patróns de xinea patriarcal, se cadra, reforzados”, sinalou o crítico Ramón Nicolás sobre o citado poemario.